Tuesday 23 March, 2010

షాయరీ

కవిత్వం
పొందిచ్చిన వాక్యాల విచ్ఛిత్తి
పేర్చిన పదాల మధ్య అలజడి
ఎగిసే అక్షరాల ఆందోళన
కవిత్వం-ఉద్యమం పర్యాయపదాలు

కవిత్వం- జొన్నరొట్టెల రుచి
నోట్లో ఊరే పచ్చి చేపల పులుసు
బీద బతుకుల ఆసరా
               అంబలి-సంగటి-గట్క
జీవి గుంజే హైదరాబాదీ బిర్యానీ

కవిత్వం- బోనం ఎత్తుకున్నది       
బోనం మట్కీల మధ్య శిగమూగుతున్నది
రంగుల్‌రంగుల పూలన్నిట్నీ ఒక్కటిచేసి
                   బతుకమ్మ ఆడుతున్నది       
అస్సోయ్‌దూలా పాడుతూ
                  నిప్పుల గుండం తొక్కుతున్నది
రోడ్డుమీదే సహపంక్తి భోజనమయ్యింది
కవిత్వం- గోడమీది నిలువెత్తు కచ్చా స్లోగన్‌
దండుబాట మీద సబ్బండ జాతుల కోలాటం
వాగ్గేయకారుడి నాలుక చివరి వాయువేగం
కణకణ మండే డప్పు సూర్యుడి మీద
               చిందేసే చిర్రా చిటికెన పుల్ల
ఉద్యమకారుడి కంటి ఎరుపు- లేచిన పిడికిలి

జవాన్ల కరకట్టల్ని ఛేదించే జనప్రళయం
ఉద్యమ ఉత్ప్రేరకమైన చదువుల బడి
ఎగుస్తున్న విద్యార్థులే జెండాలు
కాలబడుతున్న ఒంటిలోంచి
సానబట్టిన కత్తిలా దూసుకొస్తున్న నినాదం
మనసున్న కన్నులోంచి దూకుతున్న అశ్రుకణం
అవును
కవిత్వం ఇవాళ తెలంగాణ
                                   - స్కైబాబ

3 comments:

  1. kavithvam- today-telangana--
    chala baagha cheppaaru

    buchi reddy
    hanamkonda@aol.com

    ReplyDelete
  2. కవిత్వం- గోడమీది నిలువెత్తు కచ్చా స్లోగన్‌
    దండుబాట మీద సబ్బండ జాతుల కోలాటం
    వాగ్గేయకారుడి నాలుక చివరి వాయువేగం
    కణకణ మండే డప్పు సూర్యుడి మీద
    చిందేసే చిర్రా చిటికెన పుల్ల
    ee lines bavunnayi.

    ReplyDelete

మీ అభిప్రాయం తెలియజెయ్యండి