Monday 14 December 2009

లొంగని వీరుడికి సలాం!

ఒక్కో భూమ్మీద
ఒక్కో పేరుతో పుట్టుకొస్తుంటాడు
లొంగనితనం వీరుడి మాతృక

తన నేలను ఖబ్జా చేస్తూ
తన నాలుకనే తెగ్గోస్తున్న వాడికి
చివరి శ్వాస దాకా లొంగనితనం
వీరుడి పోరాట రూపమే....

నీళ్ళను కొల్లగొట్టి-
ఆకుపచ్చదనాన్ని కొల్లగొట్టి
బీళ్ళు చెయ్యజూస్తుండు శత్రువు
పెట్రోలును కొల్లగొట్టి-
సకల జీవత్వాన్ని కొల్లగొట్టి
ఎడారులే చెయ్యజూస్తున్నడు శత్రువు
వీరుడన్నవాడు సై అంటాడా
వీరుడన్నవాడు ఖామోష్‌గుంటాడా
ఖబర్దార్‌ అంటూ గుండెల్లోంచి కేక వేస్తాడు
భూమి తల్లికోసం బలిదానమవుతాడు
ఇరాకీ పిల్లవాడి తెగిన కలల రెక్కలు చూసి
చలించకుండా ఎవడుండగలడు?
వేల ఒక జాతి జనాన్ని
సమాధి చేయడం చూసి
రగలకుండా ఎవడుండగలడు?
ప్రపంచపటంమీద ఒక జాతి వతన్‌నే
మాయం చేయాలనే కుట్రను చూసి
ఎవడు భరించగలడు?
రేపు మరొక దేశం
ఖబ్రస్తాన్‌ అవబోతుండడం చూసి
ఊకుండగలడా?
చుట్టూరా చేతులు కట్టుకొని చూస్తున్న
దునియా
ఘడియకో మాటమార్చే దునియా
సిగ్గూ శరం లేకుండా
సాష్టాంగపడే దునియా
లొంగని వీరుడిముందు బలాదూర్‌
వీరుడెప్పుడూ నిజం మీదే నిలబడతాడు
వెన్నెముకే ఆయుధంగా కలబడతాడు
శాంతికోసమే ఆయుధం పడతాడు
ఓడిపోవచ్చు
కాని లొంగిపోడు
ఒక్కో భూమ్మీద ఒక్కో పేరుతో పుట్టుకొస్తుంటాడు
లొంగనితనం వీరుడి చిరునామా

వీరుడు బరిసెనో బాణాన్నో పట్టినప్పుడు
తెల్లోడు బందుఖుతో వచ్చాడు
వీరుడు బందూఖు పట్టినప్పుడు
తెల్లోడు బాంబు లేశాడు
వీరుడు బాంబులేద్దామంటే
తెల్లోడు మిసైళ్ళు ప్రయోగిస్తున్నాడు
శత్రువు గెలవొచ్చు
జనంలో వీరుడే నిలుస్తాడు
ఒక్కో భూమ్మీద ఒక్కో పేరుతో పుట్టుకొస్తుంటాడు
లొంగి బతకడం వీరుడి నైజం కాదు

రాళ్ళను పగులగొట్టే వాళ్ళల్లోంచి
ఇనుమును కరగదీసే వాళ్ళల్లోంచి
నీళ్ళను మండించే వాళ్ళల్లోంచి
ఒక్కో వీరుడు పుట్టుకొస్తూనే ఉంటాడు
ఒక్కో చోట ఒక్కో పోరాట రూపం తీసుకుంటాడు
శత్రువు బలవంతుడే కావచ్చు
జిత్తుల మారోడే కావచ్చు
నిజం వీరుడి చేతిలోనే ఆయుధంగా నిలుస్తుంది
నిజం వీరుడి చేతిలోనే ఆయుధమై మెరుస్తుంది
చివరి మాట దాకా
నిజమే వీరుడి నోట పలుకుతుంది
'సామ్రాజ్యవాదం డౌన్‌ డౌన్‌! అమెరికా డౌన్‌ డౌన్‌!'

జడ పదార్ధాలకు
రాజుకునే గుణాన్నిచ్చే ఉత్ప్రేరకం
నిశ్చల నరాల్లోకి
వెచ్చని ఊపిర్లూదే ప్రాణవాయువు
లోకమంతా పాకుతున్న
లొంగిపొయ్యే వైరస్‌ను నిలువరించే రెసిస్టెన్స్‌
ఒక్కో భూమ్మీద
ఒక్కో పేరుతో పుట్టుకొస్తుంటాడు
ఉరకలెత్తే ఉడుకురక్తాల ఆత్మల్లోకి ప్రవేశిస్తుంటాడు

ఇజ్రాయెల్‌ యుద్ధట్యాంకుపై రాయి విసిరే బాలుడో
తెల్ల రక్కసి మూక మధ్య పేలే మానవబాంబో
స్వేచ్చను కోరే కశ్మీరీ గొంతుకో
నిజమైన పౌరసత్వం కోసం నినదించే భారత ముస్లిమో
ఒక్కో భూమ్మీద ఒక్కో పేరుతో పుట్టుకొస్తుంటాడు
ఒక్కో చోట ఒక్కో రూపంలో ప్రతిఘటన
ఒక్కో స్థాయిలో పోరాటం
పోరాటం ఎక్కడైనా పోరాటమే కదా
దురాక్రమణ ఎవడు చేసినా దుర్మార్గమే కదా
వీరుడు పోరాడుతున్న భూమి
ఎకరమో...రాష్ట్రమో... దేశమో...
నాటి బందగీకి సలాం
నేటి తెలంగాణ పోరుబిడ్డకి సలాం
ఆజాదీ వీరుడికి సలాం
పాలస్తీనా చిరునవ్వు అరాఫత్‌కి సలాం
ఇరాకీ గర్జన సద్దాంకి సలాం
భూమికోసం పోరాడుతున్న వీరుడికి సలాం!
మాతృభూమి కోసం పోరాడుతున్న వీరుడికి సలాం!
                                                                          -స్కైబాబ
(నేటి తెలంగాణ ఉద్యమానికి.. ఉద్యమంలో అసువులు బాసిన తెలంగాణ బిడ్డలకు..)

3 comments:

  1. కవిత చదువుతూంటే రోమాలు నిక్కబొడుచుకున్నాయి. రక్తం ఉరకలెత్తింది. ధన్యవాదాలు.

    ReplyDelete
  2. beautifully rewritten.

    i doubt this can be applied to present/future andhra movement too, by just removing telangana word. :-)

    ReplyDelete
  3. కడుపు మండుతుంటే, గుండె రగులుతుంటే పుట్టుకొచ్చిన ఉద్యమం తెలంగాణ. సంపన్నులు, వ్యాపారస్తులు, రాజకీయులు సృష్టించిన రెచ్చగొట్టే వ్యవహారం సమైక్యాంధ్ర. తెలంగాణ వారు వేరుపడతామంటుంటే- లేదు, కలిసి ఉందామని ఇంకెన్నాళ్ళువారిని బందీలను చేస్తారు ? ఇవాళ బుద్ధిజీవులు ఎవరూ సమైక్యాంధ్ర ను support చెయ్యరు.. అట్లే లొంగని వీరుడంటే- న్యాయం తన వైపు ఉండి పోరాడేవాడు!
    - స్కై బాబ

    ReplyDelete

మీ అభిప్రాయం తెలియజెయ్యండి